ოლიმპიური ცეცხლი უკვე ბორჯომშია. ბორჯომში ოლიმპიური ცეცხლის დასახვედრად ადგილობრივები ქალაქის ცენტრში შეიკრიბნენ. ესტაფეტა ჩარხისწყლიდან რუსთაველის მოედნამდე მოეწყო.

საორგანიზაციო კომიტეტის გადაწყვეტილებით ცეცხლის დახვედრის საზეიმო ღონისძიებები 13 ივნისს თბილისში მომხდარი სტიქიის გამო დატრიალებული ტრაგედიის შემდეგ აღარ გაიმართა. საორგანიზაციო კომიტეტი კიდევ ერთხელ გამოთქვამს ღრმა მწუხარებას და სტიქიის შედეგად დაღუპულთა ოჯახებს უსამძიმრებს.

ოლიმპიური ცეცხლი ბორჯომის შემდეგ ხაშურის მუნიციპალიტეტში გადაინაცვლებს.

ოლიმპიური ცეცხლი საქართველოს რეგიონში 28 მაისიდან მოგზაურობს და უკვე 29 ადმინისტრაციულ ცენტრს ესტუმრა. ესენია: ხელვაჩაური, ქედა, შუახევი, ხულო, ადიგენი, ახალციხე, ასპინძა, ნინოწმინდა, წალკა,ბოლნისი, მარნეული, გარდაბანი, რუსთავი, საგარეჯო, დედოფლისწყარო, სიღნაღი, ლაგოდეხი, ყვარელი, გურჯაანი, თელავი, ახმეტა, ყაზბეგი, ფასანაური, თიანეთი, დუშეთი, მცხეთა, კასპი, გორი, ბორჯომი.