სპეციალური და არაგეგმიური ვიზიტით თბილისს ევროპის ოლიმპიური კომიტეტის საკოორდინაციო კომისიის COCOM წევრები ჯოზეფ ლიბა და კატერინა ნიცოვა ეწვივნენ. ერთ დღიანი ვიზიტის ფარგლებში გამართეს შეხვედრა პრემიერ მინისტრთან ირაკლი ღარიბაშვილთან და მოინახულეს ის სპორტული ობიექტები, რომლებიც 26 ივლისი -1 აგვიტოს პერიოდში ოლიმპიურ ფესტივალს მასპინძლობს.

დღის ბოლოს COCOM-ის წევრებმა არსებული ვითარება ჟურნალისტებთან შეაფასეს.

საკოორდინაციო კომისიის თავმჯდომარე ჯოზეფ ლიბა: „ეს არის ექსტრაორდინარული ვიზიტი, რადგან ჩვენ მას არ ვგეგმავდით. მაგრამ ბაქოში, სადაც ჩვენ ევროპის თამაშებზე ვიმყოფებოდით, გავრცელდა ხმები, თითქოს თბილისი წყალშია ჩაძირული. ჩვენ გუშინ ჩამოვედით და დავრწმუნდით, რომ თქვენი მთავრობა, ხალხი მობილიზებულია, მიმდინარეობს აღდგენითი სამუშაოები. ჩვენ შევხვდით პრემიერ-მინისტრს, რომელმაც დაგვამშვიდა და ყოველგვარი მხარდაჭერა გამოგვიცხადა. სასიხარულოა, რომ ასევე დროზე ესწრება ახალი სპორტის სასახლე, სადაც ხელბურთის შეჯიბრებები ჩატარდება.ჩვენ მშვიდი გულით მივდივართ ბაქოში, რათა რამდენიმე კვირაში თბილისში უკვე ოლიმპიურ ფესტივალზე დავბრუნდეთ.“

საკოორდინაციო კომისიის მენეჯერი კატერინა ნიცოვა:„საორგანიზაციო კომიტეტს საკმაოდ რთული ამოცანა აქვს, რადგან რჩება სულ ცოტა დრო. მაგრამ ისინი გრძნობენ თითოეული ადამიანის, მედიის მხარდაჭერას. მე მხოლოდ ერთს დავამატებ, „თბილისი 2015“-ს შესანიშნავი გუნდი ჰყავს!“

„თბილისი 2015“-ის საორგანიზაციო კომიტეტის თავმჯდომარე ალექსი ახვლედიანი: „ეს არ არის დაგეგმილი შეხვედრა... 13 ივნისის სტიქიურმა უბედურებამ ევროპის ქვეყნებში დიდი შეშფოთება და მწუხარება გამოიწვია, ამიტომ ევროპის ოლიმპიური კომიტეტების პრეზიდენტი პატრიკ ჰიკის გადაწყვეტილებით, თბილისში საკოორდინაციო კომისიის წევრები ჩამოფრინდნენ. მათ დაათვალიერეს ყველა ვენიუ და დარწმუნდნენ, რომ ოლიმპიური ფესტივალის ჩატარებას საფრთხე არ ემუქრება. ეს გამოცდა ჩვენმა მშენებლებმა ჩააბარეს. თქვენ იცით, რომ ჩოგბურთის კორტები უშუალოდ სტიქიის ზონაში მდებარეობენ. ამჟამად ყველა სპორტული არენა პრაქტიკულად დასრულებულია, მონტაჟდება უსაფრთხოების სისტემა.“